INDO-EVROPAKE QHIBA

INDO-EVROPAKE QHIBA

 

Indo-Evropake qhiba si maybaro qhibyengo nyamo kola si phandle disave shelqhiba thay diyalektya (450-586) astarindoy buderi Evropake, Iraneske, Mesmer thay Ratyorigutna Asiyake thay e Anatoliyake qhiba. Akale qhibyensa vakarena kotar 3 miliyarde jene ano Sumnal, kolenda 1,7 miliyarde vakarena sar daki qhib. Gandinolpe so akala qhiba sine ko puranipe yekh thay adive aqhilo numay olengo nyamipe. Akala ideyake dena phiko sar o arheologya agyahar vi o lingvistya numay najanena sar sine e angluni qhib thay odoleske akaya si akana maybari diskusiya mashkar jande manusha.

Vash te jana akava, manglape te roda hari po angle, kotar ale o Indo-Evropake qhiba.

Sar janglarena o rodlarde, sa o Indo-Evropake qhiba avena kotar Anglo-Indoevropake qhiba kola vakardile mashkar Kalo Deryav ji ki len Volga thay buhlardile ano adisutne thana. Akava may shukar mothavela e Kurgan-hipoteza, so akala qhiba avena kotar Kurgan kultura (Rusiya - Ukraina) thay buhlardile ano yaver thana kotar 5000 ji 4500 bersh angli amari epoha.

Akaya hipoteza denya e Mariya Gimbutas, Litvaniyaki/ Amerikaki arheloga, 1956. bersheste.

Numay yekh yaver hipoteza dendi 1987. bersheste kotar Britaniyako arheologi o Colin Renfrew, akhardi sar Anatoliyaki hipoteza, phenela so Indo-Evropaki qhibyengi grupako biyando than si e Anatoliya, adisutni Turkiya, ko than Qatalhöyük, adisutni Konya thay odothar buhlardile may angle ano Balkan, Evropa napal ano yaver Asiyake thana kotar 9800 - 7800 bersh angli amari epoha.

 

Sar i teknologiya nakhela angle, agyahar vi manushengo phiripe shay te khuvel tali kontrola thay adive neva teknologiyaha shay te dikhelpe but generasiye angle kotar ale o manusha thay ko kasa si pashe kotar olenge genya. Akava muthavla o rodlaripa kova kotar manushengi Haplogrupa Y-DNA muthavyola so o manushipe na alo kotar Indiya numay gelo ani Indiya. Akava shay te dikhen kotar pustika:Lambert Dolphin "The Table of Nations" , Professor Stephen Oppenheimer ki oleski pustik 'Out of Eden' (2003) thay yaver profesionalune manusha kola lenape akala problematikaya.

Sar mothavena akala hipoteze thay e manushesko haplogrupa Y- DNA, kolenge dena phiko sar o arheologya agyahar vi o lingvistya, nikyola so Indo-evropake qhibyako nyamo nani kotar Indiya thay 50% Romengo Haplogrupa Y-DNA muthavela e Anatoliya-Mesopotamlya sar Romengo kherthan. Odoleske pratsavanipa so yekh them perela yekha rashtrake numay vash odova so si ano nyamo e Indo-Evropake qhibyensa nani reslo, odoleske siyum gandipasko so manglape te roda yaver drom vash te arakha Romengo kherthan.

 

Copyright @ All Rights Reserved